介紹返，譚仔主任位比侍應高一級，再升上去先到副店長及店長。主任比侍應時薪高$1，職責一樣係做樓面落單上菜，亦需要幫店長做文書。當時人事部話鰂魚涌店有主任空缺，見工第二朝就通知我過幾日返工。譚仔出糧用中銀，制服要自備西褲、防滑鞋及髮網，於是我下晝就去銀行開戶買齊哂啲嘢。後來我再收到人事部電話話鰂魚涌店要裝修，暫時未有空缺（黑人問號？！）。我問其他分店有無位，做侍應廚房都無所謂，可惜人事部話疫情下好多分店都減人手。
有做開酒店嘅朋友失業去咗做口罩工廠；亦有多年經驗嘅設計師為開工，月薪萬四都肯做；更有主管被公司要求減半人工長達半年，只好業餘送外賣。當人人都努力為生計拋開身分，所謂嘅枷鎖重要咩？文職、商場、揸𨋢、侍應、包裝等等等等我都有應徵，呢幾日都有見工，離有工返嘅日子不遠了，好似係。
譚仔將機會留俾任何人，包括大學生，好多人可能唔知，譚仔有個子女獎學金，讀本地大學就申請得，再安排仔女到樓面實習，體驗父母返工日常。譚仔文重點唔係有無請到我，社會有唔同聲音，自問做好本分就夠。所以，加油啦！
#我正職係客服
#TravelBlogger唔淨係識吃喝玩樂
#快樂背後一樣要返工賺錢有假先去到旅行
Search